Sheekoothé ké saabséng aw Libee, Waraabé, ii ay Doweeybé

(Inté taaboy (click) sé adé sheekoothung ing dhugunsété oo dhugunséthowsheené hang dejisété).

Waraabé, aw Libee, ii ay Doweeybé iyye islé ugaarsédaayeeng.

Mayné islé heleeng eelido, idaaleyto, ii sagaarédoobby.

May hor sheenenaa aw Libee hortiis.

Kudemby aw Libeené may erreey, 

           "Mmm, mmm, mmm! Aw waraabow, niing hed-hed soꞌkéǃ"

Kudembé waraabéginé may ing hed-hethey soꞌké mayné erreey,

"Wonh, wonh, wonh! Eelidé ané iye usku leh; idaaleyténé libeeké iyye leh; sagareedéné dowiithy iyye usku leh."

Kudembé aw Libeené may dharbaaniyey waraabégii.

Waraabegii hindhoosheeyné reed iyye ingké nagétheeng!

Kudembé aw Libee may erreey,

"Mmm, mmm, mmm! Ay Doweey, soꞌkung niing hed-hedǃ"

Kudembé ay Doweeyné may erteey,

"Dowiq, dowiq, dowiq! Idaaleyté hung-gurégé afꞌbillaawkaa wu; eelithéné hung-gurigé duhurnimaathaa wu; sagaarédéné hung-gurégé hamiingnimaadaa wu!"

Kudembé aw Libeené may erreey,

"Mmm, mmm, mmh, mmh! Ay wu kii ké bari wal hethowkung séthé ing feylé?!"

"Dowiq, dowiq, dowiq! Dharbaaniyowki waraabigé lé dharbaaniyi iyye i bariǃ", iyye erti ay Doweey!

Séthé Magmaagdy Af Maay-Maayké lé erraaw,

"Hoobbé Waraabé soꞌ aréghi, soorinté maabbé aréghaaw."

Sheekoothungny may ing dhamaati saas haatow. Dowiq, dowiq, dowiq!